Nel plan inclúinse actividaes de turismu activu como les visites a llagares, o d’esfrute gastronómicu nos chigres que cunten cola marca “Sidreríes d’Asturies-Calidá Natural”
LA SIDRA.- Güei presentóse en Xixón el programa ‘Asturies a lo grande’, una iniciativa que tien como oxetivu “incentivar el consumu turísticu demientres los prósimos meses, contribuyir a desestacionalizar la demanda y sofitar l’aniciu de productos, paquetes y esperiencies”, tal que desplicó la viceconseyera de Turismu, Graciela Blanco. El proyeutu ye frutu de la collaboración establecida demientres l’estáu d’alarma ente l’alministración y los principales axentes turísticos como FADE, Otea o Otava.
‘Asturies a lo grande’ inclúi 140 esperiencies y actividaes distintes que van poder esfrutar quien acuten dos o más nueches d’estancia, ente’l 1 de setiembre y el 15 de payares, en dalgún de los 300 establecimientos xuntaos o axencies de viaxes autorizaes. El costu de caúna de les propuestes inclúise na reserva del agospiamientu y nun supon una medría del preciu.
El programa, va poner a dimposición del seutor más de 25.000 places n’actividaes de turismu. Delles d’elles tán rellacionaes col productu más identitario del país, contemplándose visites a llagares o l’esfrute de menús degustación nos establecimientos que cunten cola marca “Sidreríes d’Asturies-Calidá Natural”. Tamién se proyeutaron actividaes de turismu d’aventura, d’observación de fauna, entraes a istalaciones culturales, o sesiones de bientar.
