La presentación tuvo llugar na Casa de la Palmera de Xixón.
LA SIDRA.- Ayeri a les 12:30 tuvo llugar la presentación de la Primer Sidre’l Añu na Casa la Palmera. L’actu corrió al cargu de Carme Pérez, de la Fundación Asturies XXI, organizadora del eventu; Jesús Martínez Salvador, conceyal de Turismu del Conceyu de Xixón; y Falo Nosti, organizaor de los talleres y deportes tradicionales que van desendolcase demientres l’eventu.
En pallabres de Jesús Salvador, la sidre ye un pegollu turísticu fundamental en Xixón, una exa principal pa espublizar la cultura asturiana. Y la Primer Sidre L’Añu conviértese nel primer eventu sidreru de la ciudá, coincidiendo cola cellebración de la Selmana Santa, por que los visitantes que s’averen a Xixón puedan esfrutar de la sidre.
Declarada fiesta de raigañu social pol Conceyu Xixón, considérase la espicha más importante tanto por númberu de llagares, más de setenta, como de participantes, más de 15.000 presones l’añu pasáu.
Tanto’l Conceyu de Xixón como Divertia consideren el turismu gastronómicu de gran importancia y entórnense na promoción de la cultura la sidre. Nesti casu, inténtase recuperar la sidre “sobro la madre”, ensin trasegar, con cuenta de esta sidre nuevo puea ser compartía pol públicu xeneral.
Carme Pérez desplicó’l programa d’actividaes que va llevase a cabu nel Muséu del Pueblu d’Asturies demientres los cuatro díis que dura’l festival, del 29 de marzu al 1 d’abril:
La presentación va correr a cargu del míticu Tinu “el Roxu”, que va realizar una esibición de la so peculiar forma d’echáu.
El vienres va tener llugar el Sidracrucis, procesión sidrera que va percorrer les cais de Xixón faciendo paraes en nueve sidreríes, el Muséu del Pueblu d’Asturies y trés llagares de la ciudá.
El vienres y el sábadu cellebrarase la novena edición d’Asturianada y Sidre, onde cantantes noveles, cuantimás neños, van amosar les sos dotes pa la tonada con temática sidrera.
Coles mesmes, el domingu va tener llugar el VII Concursu de Sidre Casero Fecho en Maera.
La edición d’esti añu va cuntar con importantes novedaes, que van amestase a les del añu pasáu, tales como l’espaciu pa mascotes, la tastia de sidre’l duernu y ensin alcol o la entrada llibre p’aquellos qu’asisten en bici a el domingu.
Asina, esti añu vamos cuntar con información multilingüe en alemán, francés, inglés, italianu y portugués; menú vexetarianu; carpa infantil; tasties y maridaxes con sidres distintes d’otros países; espaciu cardioprotexíu, con desfibrilador y profesionales cualificaos p’atender al públicu en casu de necesidá; planu de sidreríes de Xixón; y el lema: “Bebi con xacíu: Ye la nuesa cultura. Ye la to responsabilidá”
Finalmente, Falo Nosti faló de los deportes tradicionales que van desendolcase mientres el festival, tales como la llave, los bolos, la xaronca, el tiru la lluria o les carreres de sacos. Tambien va realizase’l cabruñu’l gadañu y los neños van poder faer un cestu y mayar mazana con mayu pa ellaborar sidre que dempués van poder tastiar.
La sidre oficial del eventu va ser Sidre Riestra, ganaora del Concursu Primer Sidre’l Añu cellebráu’l pasádo sábadu 17 de marzu.
