Cellebraráse güei de magar les 20:00 hores na Avda. San Agustín, 8, n’Avilés.
LA SIDRA.- Güei, La Real Compañía Sidrera y Gastronómica va cellebrar el so primer aniversariu de magar les 20:00 hores. Esti chigre d’Avilés, convirtióse en tiempu récor, n’ún de los llocales de referencia del cientru la ciudá.
“La nuesa mayor ayalga son los veceros, sé que se diz muncho y ye bien populista, pero yo dígolo de verdá porque la mayoría son amigos” enfatiza’l so propietariu Miguel Ángel Solanas Cardín. La esperiencia ye’l so meyor aval. Con más de 35 años de trayeutoria profesional, entamó y rexentó dellos negocios gastronómicos en llugares como Málaga, Marbella o Tenerife.
Nesta sidrería apreciase’l percuru que se tien al echar la nuesa bébora. Tienen variedá: Ribayu, Riestra, Peñón, Zapica, Trabanco, Trabanco d’Escoyeta, y Solleiro. Esta postrera, de Taramundi, tiénenla n’esclusiva n’Avilés. Amás ca mes inclúin una sidre d’otru llagar pa ufiertar lo meyor de la nuesa bébora tradicional. Por exemplu, en septiembre echaron El Piloñu.
“Hai que tener un bon nivel, siempres tamos pendientes de les sidres que tán ganando nos concursos. Amás los llagareros sofítenmos y aídenmos abondo” siñala l’hosteleru. Y ye que Miguel Ángel sabe de sidre, darréu que vivió –amás de nel so Avilés natal– tamién en Villaviciosa. “Crecí en dambes ciudades cola meyor familia del mundu: los Cardín”, rellata.
