El certame realizóse dientro de les actividaes de La Primer Sidre L’Añu qu’ayeri preslló la so ochava edición.
LA SIDRA.- Esti añu la sidre casero vieno daqué retraso, pero entá asina 18 llagareros iscribiéronse pa participar na VI Edición de la Sidre Casero Fecho en Maera que se realiza tolos años dientru les actividaes que se lleven a cabu na Primer Sidre L’Añu. Esti añu’l xixonés Ángel Marcos alzóse col primer puestu. Enantes yá participara nel concursu y quedara ente los primeros puestos. Pero’l 2017 foi’l so añu ya impúnxose a les otres sidres presentaes. En segundu llugar quedó Llucía Fernández de Llaviana, siguía por Luis Álvarez de Mieres del Camín. El cuartu y quintu puestu fueron para Víctor Manuel Iglesias de Granda, Siero, y Falu Nosti de Caldones, respeutivamente.
El xuráu tuvo presidíu por Manuel G. Busto –tamién collaboraor de la revista LA SIDRA– y compuestu por Nacho Fuentes del llagar L’Allume, Arsenio Angones del llagar El Neciu, Pedro Baldó del llagar El Duque y Donato Xuaquín Villoria, dellegáu del territoriu español de la revista LA SIDRA y especialista na nuesa bébora tradicional. L’echáu corrió al cargu de Érika Stead y Dimas Dogadaylo. El concursu escomenzó a la una la tardi y tres los valores del tribunal, diéronse los premios a les dos y media la tardi.
De manera que per sestu añu consecutivu realizóse esti certame únicu na so especialidá. Ta empobináu a llagareros non profesionales qu’empleguen el sistema tradicional d’ellaboración de sidre en pipa de madera coles mires de da-y puxu al usu d’esti material pa la so produición, que va cayendo adulces en desusu pola xeneralización de los depósitos de fibra de vidriu y d’aceru inoxidable. Amás ye de los pocos esistentes que tien ámbitu asturianu una y bones la mayoría de los que se celebren tán llindaos al Conceyu nel que se convoquen.
Ayeri tamién foi’l día que se realizó una collaboración con ‘30 díis en bici’. Dicha asociación fixo un percorríu pela ciudá que terminó nel Muséu del Pueblu d’Asturies. Los sos miembros pudieren entrar de baldre a la PSLA, y pa xunise a la so reivindicación, la Fundación Ástures XXI dexó que toles demás presones que llevaren la so bicicleta pudieren aportar igualmente gratis al Muséu del Pueblu d’Asturies. Asina, púnxose fin a la VIII edición de la PSLA, qu’esti añui cuntó con récord de participación yá que asistieron a esfrutar d’esta celebración alrodiu les 16 mil presones.
