Pesia lo alantrao d’esta selmana santa y comu vieno’l tiempu, yá hai 42 llagares iscritos nel Concursu de la Meyor Primer Sidre l’Añu.
LA SIDRA.- A les puertes d’entamar la tercer edición del concursu que premia a la Meyor Primer Sidre l’Añu, que llueu sedrá la oficial de la PSLA que se cellebrará los prósimos 24 a 27 marzu, la participación de los llagares ta siendo munchu mayor de lo esperao, con ná menos que 42 sidres apuntaes al mesmu.
Pesia qu’esiste un ciertu cansanciu ente los llagareros por mor del elleváu númberu de concursos de sidre, y al fechu de qu’esti añu la convocatoria del concursu tuvo qu’alantrase un poco, colo que non tolos llagares tienen la sidre a puntu, el III Concursu de la Meyor Primer Sidre l’Añu afítase comu ún de los concursos de sidre referenciales nel panorama asturianu por mor del importante númberu de llagares participantes, qu’agora mesmo yá lu sitúa nun meritoriu segundu puestu, asina comu pola so especificidá, darréu que ye l’únicu que se convoca pa esta triba de sidre entá ensin trasegar.
De la sidre ganaora, mercaránse unes 100 caxes pa poneles a dimposición de los asistentes a la VII Primer Sidre l’Añu, comu sidre oficial del eventu.
El concursu tendrá llugar na xixonesa Sidrería El Otru Mallu, el 10 y 11 d’esti mes, y el xuráu tará presidíu por Manuel Busto, y conformaránlu tamién Joaquín Fernández, Guti de La Ballera, Ricardo Ríos y Mercedes de Sid. La Mareona, cuntando pal serviciu del xuráu colos meyores echaores d’Asturies, el campión del 2015 Jorge Varas, y los campiones de pasaes ediciones Wilkin Aquiles y Salvador Ondó.
Dende que va siete años LA SIDRA escomenzó a trabayar pola recuperanza de la sidre nuevo, práuticamente esaniciada del mercáu por mor de la industrialización de los llagares y l’aplicación xeneralizada del trasiegu, ca vegada van siendo más los llagares que s’animen a comercializar esta triba de sidre, siendo de destacar el casu de la Sidre d’Escoyeta, que corcha específicamente esti tipu sidre, calteniéndolu nel mercáu unos 3 meses.
