“Lo que puedo apurrir ye puxu, trabayu y enfotu” manifiesta l’actor, que tamién foi un profesional de la hostelería dende los 18 años
LA SIDRA.- Conocíu por presonaxes tan emblemáticos como La Marquesina, o Toño, el de ‘El Chigre’; pero n’especial pol so trabayu nel programa ‘De folixa en folixa’. La sidra tuvo bien presente na vida d’Alberto Rodríguez, y agora va tar más, pos entra a formar parte del equipu d’esta revista. Pero hai que destacar que la hostelería nun ye un mundu nuevu pa elli, tolo contrario. Ello ye que trabayó como profesional nesti seutor dende los 18 años. Agora en LA SIDRA va realizar les xeres comerciales de la espublización.
“La sidre ye un fenómenu que mos fai únicos. Tol mundiu tien daqué que los fai únicos. Nun se-y puede dicir a los guah.es que van ser ‘los meyores del mundiu’ porque sedría mentira. Pero sí que puen ser tolo especiales que seyan ellos. Y una de les coses que tenemos nós ye’l tratamientu de la sidre. La sidre bébese en munchos países pero la nuesa adquier individualidá y prestancia pol tratu que-y damos. Por ese acorico al echala, al sirvila y al compartila. Una botella sidre nun se toma con priesa… A ver, si hai que bebela con priesa, bébese. Pero lo normal ye que se pare’l tiempu cuando se toma una sidre” señala Rodríguez na entrevista principal que se va espublizar na prósima edición de la revista, el númberu 200, que ta a puntu salir.
