El secretariu xeneral y voceru parllamentariu de FORO Asturies na Xunta Xeneral, Adrián Pumares, reclamó énte’l Conseyeru de Mediu Rural y Cohesión Territorial la movilización de recursos pa sofitar al seutor de la sidre y la puesta en marcha d’un Plan Estratéxicu pa la sidre d’Asturies
P’Adrián, ye imprescindible y urxente l’aniciu d’una nueva llínia d’aídes que vengan cubrir l’ermu de les prometíes nel 2018 pola entós direutora xeneral de Desendolcu Rural, María Jesús Aguilar –nunca concretaes en fechos- y que, atendiendo a les peculiares circunstancies creyaes pola cris sanitario, permitan a los llagares retirar la sidre más vieyo, que nun pudo comercializase con normalidá esta temporá, y cientrase na compra de mazana asturiana pa esta nueva collecha, que se preve que seya especialmente bona. Con ello non solo taría sofitándose a los llagareros, sinón que se potenciaría la calidá de la sidre comercializao y daríase un emburrión a los pumareros, otros de los grandes perxudicaos en casu de qu’esti añu los llagares decidan non mayar y sacar a la vienta la so sidre más antiguo. Les aídes, amás, diríen venceyaes a la compra de mazana asturiano, polo que se llindaría l’avezá compra de mazana foriato.
Comu puntu de comparanza, Pumares destacó que mentes que los pumareros asturianos puen optar namás a parte de los 200.000 € que’l “Principado” dispón p’aídes pa fomentar el cultivu de piquenos frutos, nel País Vascu, onde la sidre nun tien la relevancia social, económica y cultural que tien en Asturies, el Gobiernu vascu pon en marcha una subvención de 50 millones d’euros pa los llagareros, xuntu col seutor vitivinícola y la cerveza, y la Diputación de Guipúzcoa una subvención de 295.000€ pa la meyora y el desendolcu de pumaraes.
La difícil situación pela que pasa la hostelería, onde se producen el 85% de les vientes de sidre natural -siendo l’únicu puntu de vienta de dellos llagares- foi’l puntu de partida de la so intervención.
De siguío, destacó qu’esti nun ye un problema nuevu, consecuencia de la cris sanitario, sinón agraváu por ella, una y bones el seutor sidreru lleva décades reclamando l’atención que merez. Al referise al seutor, esclaria, non solo apunta a los llagares, sinón a tolos implicaos na cadena de valor del seutor de la sidre, “dende los viveristes fasta los llagareros, pasando polos collecheros, polos pumareros”.
No que fai a estos caberos, Adrián Pumares recordó qu’entá hai abondos piqueños productores de mazana que nun tán iscritos en REGEPA, el Rexistru Xeneral de la Produición Agrícola, requisitu indispensable pa que la so mazana seya mercá polos llagares. “En casu de ser inflesibles y caltener la obligatoriedá, lo que sedría un erru, procede una campaña de promoción, de comunicación, a estos piqueños productores” declaró.
Finalmente, el voceru de FORU recordó a los presentes la estrema importancia de la cultura asturiana de la sidre, que ta declará Bien d’Interés Cultural pol Principáu d’Asturies, polo qu’ellos mesmos tien la obligación de protexela y sofitala, y qu’amás ta en víes de ser reconocida pola UNESCO Padremuñu Inmaterial de la Humanidá.
