La DOP Sidre d’Asturies tornará a rexistrar un xorrecimientu positivu aseguró’l Conseyu Regulaor nel X Salón de la Denominación d’Orixe, un alcuentru nel que Sopeña, Pomarina y la nueva brut de Muñiz convirtiéronse nes sidres istitucionales de la marca de calidá
LA SIDRA.- Cinco millones de botelles con “la etiquetina” ye lo que se quier algamar nesti 2019. Asina lo manifestó Tino Cortina, presidente de la DOP Sidre d’Asturies nel X Salón de la Denominación d’Orixe Protexía. Un alcuentru nel que se demostró la fuercia y el rixu d’un seutor que continúa al alza, con un xorrecimientu positivu una vegada más. Dempués de que’l pasáu añu les vientes de la DOP Sidre d’Asturies aumentaren un 73% respeutu al añu enantes, el Conseyu Regulaor de la Denominación d’Orixe Protexía Sidre d’Asturies presentó un xorrecimientu del 35% nos cinco primeros meses del añu.
“Creo, siendo optimistes, que sedremos quien a acabar l’añu 2019 con una vienta de cinco millones de botelles, lo que yá mos posiciona nel mercáu, amás de que tenemos una bona perspeutiva de xorrecimientu pa los prósimos años. L’aumentu del 73% nes vientes ye un datu coyuntural porque hebio una incorporación masivo de llagares a la DOP y eso nótase nos resultaos. Pero lo cierto ye que’l consumu sigue xorreciendo, vamos fortaleciéndomos y eso ye los más importante, el ver que pa la nuesa mazana hai futuru tamién” desplicó pa esti mediu de comunicación el presidente del Conseyu Regulaor.
Amás de Cortina, l’actu cientral cuntó cola presencia de la conseyera de Mediu Rural y Recursos Naturales, María Jesús Álvarez; el Presidente d’OTEA, José Álvarez Almeida: Ana González, alcaldesa de Xixón y Pedro López Ferrer, vicepresidente de la Cámara Comerciu de Xixón.
Un de los momentos más importantes del actu tuvo llugar cola entrega de los gallardones a les meyores sidres. Sopeña, de Martínez Sopeña Hermanos, foi distinguía como la “Meyor Sidre Natural Tradicional”; Pomarina, de Valle, Ballina y Fernández, como “Meyor Sidre Calistrao”; y la Sidre d’Espolleta Natural Muñiz Brut, de Sidra Muñiz, foi reconocía como “Meyor Sidre Natural d’Espolleta”. El premiu al meyor pumareru foi pa Cesáreo Ferrera, y el nomamientu d’embaxaores del 2019 de la DOP foi pa les xugaores del Telecable Xixón de hockey sobro patinos.
