Dempués de 18 años de récors consecutivos d’echáu simultaniu de sidre, esti añu nun pudo repetise la fazaña.
LA SIDRA.- La Fiesta de la Sidre vivió ayeri un de los sos momentos más emblemáticos, col echáu simultániu de sidre, onde dempués de 18 ediciones superándose’l récor añu tres añu, tol mundiu esperaba repetir la fazaña. Llamentablemente nesta ocasión quedóse a 203 botelles de superar el númberu participantes del añu pasáu: 8.363 echaores, frente a los 8.565 de 2015.
La verdá ye que’l tiempu nun aidó un res, con augua, truena y rescamplíos, pero tamién ye verdá que ca añu se fai más abegoso superar cifres tan importantes… y tamién que como pasa con toles coses, enxamás nun hai que dar ná por sentao, y hai que poner tol enfotu del mundiu pa sacar les coses alantre. Vala la reflexón pal conxuntu del mundiu la sidre, y recordatoriu de como munches iniciatives interesantisimes y que namás requeríen enfotu y trabayu, comu la declaración de la cultura asturiana de la sidre comu padrimoniu de la humanidá, puen quedar en ná si nun hai un esfuerciu detrás.
Polos demás, El Castrillón tornó a ser una folixa de primera, y ver a más de 8.000 presones echando al empar un culín de sidre, ye una imaxe impresionante, de les que nun s’escaez, y el resultáu, mal que-yos pese a eses 203 botelles, nun pue calificase más que comu estraordinariu, talamente comu vien siendo esta edición de la Fiesta de la Sidre de Xixón, ca vegada más afitada y con mayor presencia de la cultura asturiana de la sidre.
