La Universidá d’Exeter entamó una riestra conferencies sobro la sidre col entítulu “Guetando una definición pa la sidre”.
LA SIDRA.- Nel Reinu Xuníu tienen nidio la necesidá d’afondar na sidre y na so cultura y faenlo entamando una riestra conferencies sofitaes por tres universidaes, la d’Exeter, la de Plymouth y la de Gales. Poro, el pasáu 12 de setiembre aconceyaron n’Exeter tantu productores, xente del mundiu la sidre, profesionales y espertos.
De los ponentes, destaquen la Dra. Emma Jayne Abbots, de la Universidá de Gales; el mayestru Harry West, d’Exeter, y el Dr. Kevin Page, de la Universidá de Plymouth. Pela parte la industria falaron Matthew Talbot, espertu en DOP y llexislación, y Alison Spencer, esperta en mercaos internacionales, certificáu d’alimentos y responsable de la marca Kiwa agrifoods.
L’envís cimeru d’esti alcuentru ye l’algamar una definición de qué ye la sidre, y ufiertábense destremaos términos, dellos conocíos y dellos non, pa unificar la nomenclatura dafechu. Pa la sidre artesanal, la fecha mayando mazanes y formientando’l zusmiu, comu por exemplu nel estilu asturianu, propunxéronse los términos sidre casero, tradicional, auténtico (rial) o sydra (cyder).
Otru puntu importante foi’l decidir el conteníu mínimu de zusmiu de mazana, y proponíase partir d’un mínimu del 35 %. Tamién foi de remarcar l’alderique pa decidir si s’almitiríen concentraos dientru de lo que llamen sidre artesanal.
Dempués d’esti intensu díi de conferencies y alderiques, anunciarase si s’algamaron decisiones conxuntes cola intención d’afincar unos estándares xenerales pa toos y tamién poder nun futuru rexistrar una marca de calidá pa la sidre.
