Sedrá’l prósimu vienres y nel actu nomaráse al actor Roberto Álvarez como Embaxaor de la Sidre d’Asturies Solidaria 2018
LA SIDRA.- N’años anteriores esta espicha tuvo entamada polos llagares de Mazana Seleicionao, empreses qu’en 2017 anunciaron la so incorporación a la Denominación d’Orixe y qu’esta collecha pasada yá presentaren los sos productos. De tala miente que, agora, l’actu ta entamáu pola Denominación d’Orixe Protexía Sidre d’Asturies en collaboración cola Fundación Sandra Ibarra de Solidaridá Frente al Cáncanu. L’oxetivu ye recaldar fondos pa dar puxu a la Escuela de Supervivientes.
La espicha cellebraráse’l 14 setiembre nel llagar Castañón en Quintueles. Llagar que, por cierto, fo’l venceor del pasáu Concursu de Sidre Natural de Villaviciosa. “Toa una fiesta alrodiu a la Sidre d’Asturies y con un oxetivu enforma importante: da-y puxu a la Nueva Escuela de Supervivientes”. Asina definen esti eventu los organismos participantes y aseguren que ye’l frutu del conveniu de collaboración que caltién la Sidre d’Asturies, na que participen los 31 llagares de la DOP xunta con 322 productores y la Fundación Sandra Ibarra. El cosste de participación nesta espicha ye de 30 €, de los que 10 € sedrán donaos a la Fundación SAndra Ibarra. Les entraes pa la Espicha Solidaria yá tan a la venta na sé del Conseyu Regulaor en Villaviciosa y na direición: https://entradium.com/
Demientres la Espicha conoceremos el llabor d’un presonaxe públicu que destacara nel espardimientu y promoción fuera d’Asturies de la cultura de la Sidre d’Asturies. El gallardonáu sedrá l’actor de cine, teatru y televisión Roberto Álvarez, pol so continuáu llabor de promocióny espardimientu de la cultura y la tradición de la Sidre d’Asturies en tol territoriu estatal.
