Entamu
Entra esti nueu númberu de LA SIDRA n’imprenta al empar qu’entama en Xixón el Festival de la Sidre Natural, fortunosa coincidencia qu’aprofitamos pa felicitar a Rosabel Berrocal pol so estraordinariu llabor al frente d’esti eventu, y qu’esti añu, a les puertes de la so xubilación, recibirá’l Tonel d’Oru otorgáu polos propios llagareros.
Tamién ye momentu de felicitar al “Principado”, que vien d’aniciar un comité -de calter consultivu- pa llevar alantre la candidatura de la cultura sidrera asturiana a la Unesco. Ye la so primer actuación nesti campu tres cuatro años d’inactividá dafechu, y sedríe deseyable que marcare un cambiu d’actitú y un compromisu rial.
Ente los miembros d’esi comité les ausencies son sonaes, dándose’l casu de presonalidaes indiscutibles del mundiu la sidre qu’ensiquiera nun fueren valoraes pa integrase nel mesmu, y lo que ye más grave, falta la representación d’asociaciones populares imprescindibles nel contestu de la cultura asturiana de la sidre, tales como l’Asociación para el Fomento de la Sidra Tradicional, o el Club Sierense de Amigos de la Manzana, por citar delles de les más actives. En cualisquier casu, y considerando que tovía tase a tiempu d’emendar fallos, trátase d’un pasu alantre qu’hai de valorar de forma positivo.
Pelo demás, un agostu soleyeru ta allegrando fiestes, romeríes, merenderos y chigres en xeneral, y fai que’l verdi de la nuesa sidre compita col verdi del alrodiu, y que s’aprofite’l bon tiempu pa esfrutar d’ún y d’otro. Ye un bon mes nel que los eventos sidreros tornen acumulase y nel que yá escomenzamos agüeyar pa los pumares con ciertu esmolecimientu, porque too paez indicar qu’esti nun va ser precisamente añu de mazana. Por increyible que paeza a estes altures, seguimos careciendo la vecería, ensin ser quien a normalizar la produición de mazana.
Y pa finar, tamos a poco más d’un mes del Salón Internacional de les Sidres de Gala -SISGA-, nel que s’anuncien novedaes, y una importante presencia internacional. Bien.
