Cellebrose la yá tradicional fiesta d’acueyimientu de toles delegaciones p’acercar les naciones nún ambiente d’hermanamientu distendíu.
El pasáu xueves 9 d’agostu, a les 6 de la tardi, les delegaciones internacionales del Festival Intercélticu d’An Oriant teníen una les cites más especiales del festival, xuntu cola Grande Parade: la folixa d’autoridaes ufiertada pol subprefectu de la ciudá y delegáu de gobiernu del distritu de Morbihan, Pierre Clauvreuil, que tomó posesión del so cargu en marzu del pasáu añu.
Asina siguióse con una tradición fixada dientru’l calendariu festivaleru fae cuantayá, aú la intención ye d’abrir un espaciu destremáu del ambiente xeneral del festival pa toles autoridades y delegaciones que participen nel mesmu.
LA SIDRA y la Delegación Asturiana, representada pol delegáu Iñaki Sánchez Santianes, ficieron entrega d’una botella de sidre brut asturiana al suprefectu Clauvreuil y a Lisardo Lombardía, direutor del Festval Intercéltcu d’An Oriant. D’esta miente queríemos gasayar a les personalidaes colo meyor y más esquisito que la nuesa cultura sidrera pue ufiertar.
Dientru l’eventu podíen tastiase les más fines elaboraciones gastronómiques a bas de productos bretones y franceses, ente les que destacó el maridax ente el vinu blancu y les ostres fresques del Golfu Morbihan. L’animación cultural y musical corrió a cargu de dellos grupos d’artistes de les delegaciones presentes, onde ocuparen un llugar mui especial les arpes galeses y la música y el baille tradicional del país honráu n’esta edición.
El responsable d’aportar los sones asturianos a esta sesión, el xoven gaiteru Jesús Fernández González, pilló a toos despreveníos con una actuación comu la copa d’ún pinu: foi l’encargáu de sosprender a tolos asistentes no cimeru’l carbayu que domeñaba los xardines de la residencia’l subprefectu.
