El pabellón asturianu bate records de visites y ventes nel añu de la so vuelta con nueva xestión, programación cultural variao y productos d’alta calidá y d’innovación gastronómica.
Asturies tien un sitiu especial nel coral de los bretones y la xente celta que cada añu pasa pol Festival Intercéticu d’An Oriant. Poro, l’añu pasáu dexó un furacu bien grande que nun se pudio enllenar, dao que nun hebio representación de nueso ente los pabellones del festival.
Sicasí, esti añu renovóse esa presencia con más enerxía y voluntá que nunca. L’encargáu de tomar les riendes foi Jesús Adrián Rodríguez Álvarez, qu’antaño fore encargáu d’esti trocín d’Asturies en Breizh, y que anguañu decidió apostar too pa recuperar la ilusión de los miles de visitantes que queríen tener Asturies dientru’l festival.
Pa ello sirvióse de los productos más representativos de la cultura de nueso: ente les bayuroses muestres de gastronomía asturiana, atopóse sidre natural del Llagar Contrueces, asina comu novedaes cerveceres de la mano de SCONE, desmarcándose del restu pabellones con una cerveza de calidá y carácter. Los dixestivos corrieron a cargu d’Oruxos Monasteriu de Corias, qu’aportaren una variedá bien rica que cubría tolos gustos posibles. El publicu quedó especialmente impresionáu polos platos típicos asturianos, qu’esti añu aportaron una versión renovada ya tradicional.
Toles xestiones del pabellón que diben surdiendo pudieron solventase rápidamente col sofitu de Nicolás Radin. El públicu pudo esfrutar de numberoses actuaciones musicales, dende’l grupu Melandru, fasta’l soníu del rockabilly acadiense, pasando por micros abiertos y actuaciones de los grupos que representaron a Asturies nel festival: la Banda Gaites Villaviciosa, la Banda Gaites El Gumial ya el Grupu Baille San Félix, que ficieron les delicies de tolos visitantes del pabellón.
Les dos presentciones del VIII SISGA ufiertaes pola delegación de LA SIDRA y la FUNDACIÓN ASTURIES XXI ocuparon un llugar destacáu pa los fieles clientes de la carpa, que pudieron deprender sobre les destremaes variedaes de sidre amás de la natural, de más d’ochu países y que foren un ésitu dafechu.
Dende’l pabellón agradezse también a la Delegación Asturiana del festival y al so responsable, Iñaki Sánchez Santianes, por tol sofitu y la bona muerganización nestes feches marcaes a fuéu nel calendariu de tou aficionáu al folk y la cultura celta. Tamién damos les gracies a la Conseyería de Turismu d’Asturies, qu’aportó un puntu d’información turístico que resultó de gran utilidá pa tolos visitantes potenciales del nuesu país.
L’añu que bien promete, pero esti añu la vuelta d’Asturies foi por tolo altu.
