La televisión pública asturiana estrenó’l pasáu domingu un nuevu programa dedicáu a la cultura sidrera. Mundu Sidreru, presentáu pol periodista Inaciu Galán, emítese los domingos a les 21:30 hores y cuenta cola collaboración de la DOP Sidre d’Asturies.
LA SIDRA.- Nesti segundu capítulu de Mundu Sidreru l’entrevistáu principal va ser Marcos Abel Fernández, direutor de la revista LA SIDRA, que cumple quince años en 2018. Amás, el programa percuerre’l llagar Viuda de Angelon, onde vamos conocer más a fondu la Sidre d’Asturies esplumoso y el so procesu d’ellaboración.
El chigre visitáu nesta ocasión ye’l xixonés La Cuadra de Antón, onde Noelia del Prado, la so xerente y cocinera, va enseñamos el so proyectu de chigre ecolóxicu, plantegando al presentador del programa un retu.
El programa inclúi una receta fecha con Sidre d’Asturies pol cocineru Lluis Nel Estrada que nesti casu va consistir en dos versiones del chorizu a la sidra. Esti capítulu va averanos tamién a la Travesera de los Picos d’Europa y a saber más colos participantes nel Concursu sidreru.
