Apocayá que tan surdiendo nel nuesu mercáu nueves tribes de sidre, y ente elles dalgunes d’industries multinacionales nes que los sos fabricantes nun usen el nome de sidre sinon de cider pa distinguiles de les sidres naturales y tradicionales porque la so fechura nun ye la mesma que la d’una sidre tradicional.
En dellos artículos anteriores yá faláremos del apueste qu’estremaes empreses del ámbetu de la cerveza y el vinu tan faciendo por metese nel mundiu la sidre y mentábemos dellos casos como’l de Vinos García Carrión (vinu Don Simón), que yá lleva años cola sidre de la so marca Don Simón nel mercáu, y tamién el de la multinacional cervecera Heineken, que ye la mayor ellaboradora de sidre nel Reinu Xuníu.
Nesti sen, trayemos el casu de les campañes que recién tan faciendo les empreses Heineken y Coca-Cola pa la sidre enfrescante Ladrón de Manzanas y el refrescu de mazana, d’orixe surafricanu, Appletiser.
P’atalantar lo importante d’estes nueves inversiones en bébores de sidre y mazana de les grandes corporaciones nun hai más que dicir que les empreses d’esta triba tienen numberoses marques nos mercaos de les islles britániques, países nórdicos y cientru Europa, arriendes d’otros países como Bélxica, Holanda ya Italia.
*Donato Xuaquín Villoria
