Consistirá nuna espicha tradicional onde los productores y amigos de la sidre van esfrutar d’una degustación de la produición local.
LA SIDRA.- El prósimu 30 de xunu,de magar les 20 hores, Pimiangu -Ribedeva- cellebrará la so tercer edición de la Xornada de la Sidre na qu’esperen cuntar con tolos llagareros del pueblu, asina como una amuesa de la sidre producío nos llagares más importantes del oriente d’Asturies: Valleoscuru de Tresgrandas, Cabañon de Nava, El Cuchareru de Nueva y Pamirandi de Asiegu.
La presentación de la Xornada dirá de la man del Clú Sierense d’Amigos de la Mazan (CSAM), que comentará aspeutos sobro la ellaboración de la sidre, tendencies d’anguañu y curiaos y controles del procesu. Cumpliendo asina con ún de los oxetivos de la Xornada que ye meyorar la conocencia de la sidre y la cultura sidrera asturiana.
La tastia y valoración de les sidres llocales sedrá fecha por D. Severino Cuevas, reconocíu xuráu de concursos de sidre casero.
Tamién ta previsto, dientru la Xornada, facer un hermanamientu con otros productores de sidre tradiconal, esti añu con Pañeda Nueva -Siero-, pol so reiteráu sofitu a Pimiangu y n’especial a esta Xornada. Tratamos asina xuncir dos pueblos de carauterístiques asemeyaes y tradición na ellaboración de sidre casero.
Nesta xornada acompañara’l Coro Santa Apolonia de Pañeda qu’amenizará con una amuesa de canciones asturianes, remembrando los cancios de chigre.
Pal ésitu de les Xornaes , cúntase cola collaboración de los vecinos, cola aportación de manxares y postres caseros, asina como tortielles y empanaes.
