Entamu

En plenu branu too se torna sidre. Nun hai folixa, cellebración, eventu o simple aconceyar de collacios que nun acabe –o escomience- con unes botelles de sidre. El rixu de la cultura asturiana de la sidre ye talu qu’en munches ocasiones la sidre acaba siendo la protagonista del eventu perriba de lo que se pretende cellebrar, ye’l casu del Xiringüelu en Pravia, y ca vuelta más de Les Piragües, o San Timotéu, por citar delles fiestes de les más conocíes.

Del estremu oriental al más ocidental de país, equí nun valen falses divisiones alministratives, toa Asturies riégase de sidre y tantu asturianos como visitantes puen esfrutar de la nuesa bébora más emblemático, un auténticu tótem de la nuesa identidá xunto cola llingua asturiana y la gaita, como bien diz Xune Elipe na entrevista cola qu’entama esti númberu de LA SIDRA.

Y de nueu dende’l “Principado” anúncienmos que van retomar la propuesta de declaración de la Cultura Asturiana de la Sidre como Padremuñu Imaterial de la Humanidá pola UNESCO, taríe bien que fuere cierto. Dende la primer vegada que lo anunciaren, otres iniciatives asemeyaes yá algamaren esta distinción –Les Falles de Valencia- y el “Principado” entá nun llegó nin a presentar la candidatura. Falten pallabres pa calificar semeyante desenfotu yá incapacidá, por eso, esperemos qu’esti nueu anunciu seya’l definitivu y bramente se concrete.

Polo demás, les espeutatives a curtiu plazu son interesantísimes, tenemos la Fiesta de la Sidre de Xixón y la de Villaviciosa, Campomar en Tapia y un mes más alantre’l VII Salón Internacional de les Sidres de Gala (SISGA) qu’esti añu preséntase más internacional que nunca, cola participación de llagares de Xapón o Sudáfrica –amás de los avezaos países europeos-, y que veráse complementáu con nueves actividaes, como’l Primer Alcuentru de Periodistes y Bloggers de la Sidre, y con nueves propuestes gastronómiques como’l “Xardín de los Saborgos”

Tamos nun bon mes, y a pocu que’l tiempu aíde, les posibilidaes son estupendes. Sepamos aprofitales.