El míticu llagareru normandu confirma la so intención de participar nel Salón Internacional de les Sidres de Gala ’17 (SISGA’17)
LA SIDRA.- N’entrevista presonal caltenía con redactores de LA SIDRA nel so llagar, Eric Bordelet confirmó el so interés pol proyeutu del SISGA; y el so interés en participar na edición d’esti añu, que se cellebrará del 29 setiembre al 1 d’ochobre en Xixón. Eric Bordelet ye un llagareru de refencia nel panorama sidreru internacional, que xunce la esperiencia y el conocimientu que-y permite desendolcar una filosofía propia del productu, lo que define’l “savoir faire” de la casa Bordelet (Charchigné. Normandía), de tala miente que la so sidre, perea y calvados (auguardiente de sidre), cunta con un unánime reconocimientu ente los profesionales del seutor.
La participación d’esti llagareru, artesanu y artista de la sidre al empar, nel SISGA’17 supón tou un sofitu a la propuesta que se fai nesti eventu de xuncir les “Sidres de Gala” cola alta gastronomía, y afondar nel conocimientu y espardimientu del productu nun contestu internacional nel que los llagareros seyan los principales protagonistes. Nesi sen ye de solliñar como añu ente añu los premios SISGA van algamando mayor reconocencia internacional, tanto pola calidá de les sidres presentaes, como pola particularidá única nesta triba d’eventos que supón que los propios llagareros participantes formen parte del xuráu, lo que torga cualisquier intentu de manipulación de los mesmos.
A un par de meses del eventu, la única torga posible pa la presencia d’esti llagareru nel SISGA’17 ye la evolución de la collecha, que percuria presonalmente. Esperemos que nun hebia novedá y poder cuntar con elli.
