Entamu
El mes de xunetu ta siendo especialmente agradecíu, y non solo pola profusión de fiestes de toa triba onde la sidre ye protagonista principal, sinón porque nesti mes consiguiéronse una riestra llogros qu’ensin dubia podemos considerar como hestóricos: la confluyencia de llagareros en Sidre d’Asturies DOP, especialmente de la otra marca de calidá, la Sidre d’Escoyeta, la renovación del Festival de la Sidre de Nava, qu’anque pausada ye continua y acertada, y la sentencia de la TSXA que, tres denuncia de la nuesa editorial, conderga al “Principado” pola arbitrariedá cola que concede aídes y sovenciones, y que tantu perxudicó a la nuesa revista LA SIDRA y a la web lasidra.as.
Del pasu alantre na Sidre d’Asturies DOP hai tanto que dicir qu’esti mes editemos un númberu especial nel que se trata específicamente d’ella.
Del Festival de la Sidre de Nava damos amplia cuenta d’elli nes nueses páxines, y habría qu’amestar como valoración xeneral que l’ésitu de les sos nueves iniciatives tuvieren d’animar a una evolución entá mayor. Paecen tener nidios los oxetivos y nun taría de más un poco de premura.
Tocántenes a la conderga al “Principado” lo dicho, un trunfu de la dignidá y del sentíu común sobro aquellos qu’utilicen l’Alministración como mecanismu de chantaxe premiu/castigu y tán avezaos a financiar redes clientelares, dóciles y serviles por definición. Ser independiente y caltener la coherencia tien un preciu que LA SIDRA vieno pagando con gustu. Cola sentencia del TSXA queda n’evidencia l’arbitrariedá nes concesiones de sovenciones per parte de “Principado”. Esperemos que les coses camuden.
Y agora mesmo que se mos atropen les fiestes de prau, onde la sidre siempres foi protagonista, sedríe un bon momentu pa cavilgar sobro elles. Nun se trata namás de que la absurdamente restrictiva llexislación del “Principado” les ponga en pelligru, y que la SGAE se cebe nelles, trátase de que pasu ente pasu fueron perdiendo’l so calter tradicional. Adulces va decayendo nelles el consumu de sidre, gracies a la mala calidá de delles de les sidres que se sirven y tamién a la xeneralización del botellón, espresión de la terrible aculturización que carez la mocedá asturiano. Va haber que camentar nello.
