La selmana pasada, el Llagar Sidrería El Cabañón -Naves, Llanes- cellebró la so tradicional espicha-corderada.
LA SIDRA.- El conocíu “llagareru-chigreru-showman” Jacinto Vela Carriles agasayó a los sos convidaos, collacios, veceros, chigreros y llagareros con una espichona pa cellebra el branu llaniscu.
Nesta multitudinaria espicha participaron los llagareros de Huerces, El Güelu y El Cuchareru, los parrilleros de J.J. de Llanes y de La Veguca de San Roque de L’Acebal, xente de la cuenca, como los de Casa Xuaquina de La Nueva y xente de Xixón, como’l 4 veces campeón d’echaores Pablo Costales de la Sidrería El Cuetu.
De la hostelería llanisca tamién taben del Hotel Aldama de Quintana y del Hotel La Fonte de Naves, del Camping Mª. Elena de Celoriu, del Roxín d’El Mazucu, del Katanga de Lledías y del Mundo de la Cerveza de Riocaliente.
De l’Asturies de Santillana tamién llegó a probar la sidre l’entamaor de fiestes de prau Pedro y Compañía, que lleva la sidra Cabañon por munches fiestes del Oriente y de la comunidá vecina.
La xornada tuvo amenizada pol Grupu de Gaites Principáu, por Ana a la guitarra y polos cantantes de asturianada, Quico el de Blimea y Ricardo el de Sinariegu q’ente culete y culete echaron unos cantarinos.
A la fin, y como siempres, n’El Cabañón corrió la sidre “mogollón” imponiéndose por poco el Llote 12 como ún de los más apreciaos ente los asistentes, anque había una perbona calidá y Jacinto va a tener que esforzase pa escoyer el so meyor llote pa mandar al concursu de Nava. Pa trayelo fasta Nava tamién tuvieron presentes tres miembros de la Bona Confradería de los Siceratores d’Asturies que con sus capes dieron un pocu más de collor al convite.
