La DOP Sidre d’Asturies quier reforzar el significáu de la pallabra Auténticu colos hosteleros.
LA SIDRA.- El CR DOP SIDRE d’Asturies presentó ayeri la so nueva campaña publicitaria, protagonizada por 21 hosteleros del seutor sidreru, como principales prescriptores de la Sidre d’Asturies DOP. Trátase d’una continuación de la campaña del añu pasáu, protagonizada por Rodrigo Cuevas, y qu’aseguren que llogró bonos resultaos. “Xenuina, auténtica, única”, son dalgunos de los valores que s’escuenden tres esta campaña y que describen dalgunes de les propiedaes de la SIDRE d’Asturies con denominación d’Orixe. La campaña va enllargar mientres dos meses, hasta’l prósimu 15 d’agostu, y va tener espardimientu al traviés de toles canales de comunicación: prensa escrito, radio, televisión, redes sociales y distintos soportes esteriores.
El spot de televisión ta protagonizáu por distintos chigreros que ponen en valor les propiedaes qu’estremen a la Sidre d’Asturies con denominación d’orixe del restu de bébores. Tamién inclúi un vídeu d’unos cinco minutos de duración, y que protagonicen estos 21 hosteleros que, al traviés de distintes conversaciones, ponen en valor la Sidre d’Asturies con denominación d’orixe como productu auténticu. Esti vídeu va espublizase al traviés de la canal de Youtube del CR DOP Sidre d’Asturies.
A la rueda prensa de presentación de la campaña asistieron el xerente del CR DOP Sidre d’Asturies, Daniel Ruiz; el responsable de marketing de la campaña, Juan García Colorado (Arrontes y Barrera) y cuatro de los hosteleros que protagonicen esta nueva campaña: Jorge Ramos (sidrería Los Pomares), Abraham Castellanos (sidrería Fonte Villoria), Ricardo Villa (sidrería Begoña) y Pablo Costales (sidrería El Cuetu).
