Una vuelta más, la llexislación española recurtia les posibilidaes de desendolcu a los llagares asturianos.
LA SIDRA.- Pesia que la sidre de pera ye un productu tradicional asturianu, conocíu con esi nome dende siempres, la llexislación española -tan vinatera como ignorante de lo que ye’l mundiu de la sidre- esclúi nel so rial decretu aprebáu en febreru pol Ministeriu d’Agricultura, la categoría de sidre de pera, colo qu’esa denominación pasa a ser illegal, ya impide la comercialización de la sidre de pera col nome que-y ye propiu.
N’Asturies, onde como dicíemos nun entamu, la sidre de pera ye un productu tan tradicional y hestóricu como la de sidre de mazana, por más que la so produición y consumu se viere peramenorgáu nos tiempos caberos, namás el llagar Viuda de Angelón comercializaba esi productu -dende 2011-, y agora, por mor d’esta llexislación española, vióse obligáu a aparar la fabricación y distribuición d’esta bébora, anque les tiendes y chigres qu’entá la tean puen siguir vendiéndola fasta escosar les esistencies.
La sidre de pera ellabórase na práutica totalidá de países sidreros, como Bretaña, Normandía, Quebec, Inglaterra o Irlanda, ónde la so llexislación recueye con normalidá esa denominación. Nel casu d’Asturies, y como yá dixéremos nesta revista, la llexislación española torna a amosar la so desconocencia del mundiu de la sidre, menospreciando la cultura asturiana de la sidre y recurtiando una vuelta más les posibilidaes de desendolcu téunicu y económicu de los llagares asturianos.
