Güei llevóse a cabu’l concursu “En busca del meyor cachopu con Xata Asturiana” y ganó María Busta de Casa Eutimio
LA SIDRA.- Asturies escominez fuerte y relluma en Salón de Gourmets. Dempués de les crítiques y quexes llograes l’añu pasáu polos stands que’l “Principado” llevara a esta feria, súpose tomar nota y tornó al salón con un espaciu qu’eslluma. Cientos de bombilles anuncien con lletreros a lo cimero’l nome del nuesu país, y ca esibidor tamién les tien destacando’l nome de la so empresa. En total son 16 les que formen parte de la fastera d’Asturies y otres ocho les que cunten con stand individual distribuyíes pelos seyes pabellones del IFEMA onde se realiza la feria gastronómica. Amás, tamién podemos atopar cinco queseríes na cortil proyeutada pa Gourmet Quesos.
A les 11:30 la mañana la conseyera de Desendolcu Rural y Recursos naturales, María Jesús Álvarez, escomenzó la so visita a toles empreses asturianes del salón, amás de participar en tasties y demostraciones del espaciu “Alimentos del paradisu natural”. Foi nesi puntu onde s’atopó cola ministra del MAPAMA Isabel García Tejerina y brindaron con sidre DOP “Sidre d’Asturies”.
El platu fuete de Salón de Gourmets, nunca meyor dicho, foi’l concursu estatal “En busca del meyor cachopu con Xata Asturiana” nel que participaron sidreríes y restoranes d’Asturies y del territoriu español: Casa Cortina en Amandi, Casa Chema d’Uviéu, Casa Eduardo en Samartín de Lluiña en Cuideiru, Casa Eutimio de Llastres, Con Dos Fogones de Madrid, El Llar de Viri en Candamo, El Ñeru de Madrid, Gastrotaberna Etrusco de Xaén, La Bolera en Pravia, La Mar y Morena d’Uviéu, La Talamera de Ribeseya y Las Tablas del Campillín tamién d’Uviéu.
La xoven xef María Busta de Casa Eutimio impúnxose cola so creación “Cacholetus” del que destacó la materia primo col que ta ellaboráu. Bien emocionada recoyó’l premiu que-y apurrió Sergio Blasco, presidente de IGP Ternera Asturiana. Pela so parte Bertha Vargas de Casa Eduardo llogró’l segundu puestu col so “Cachopu de Xata Roxa sobro tortiella de maíz, guacamole y cebollina carambelizada”. “Ye un cachopu asturmexicano, ye distintu pero ta bien bonu” dixo al públicu y vese que col amiestu, gánase. Y de terceres, premiu a un cachopu inclusivu, pos Lluis Estrada y Alejadro Fervienza de La Talamera prepararon un cachopu “ensin gluten” aptu pa celiacos. “Queríemos demostrar que pue llograse tol saborgu” señaló Estada pa esta revista. ¿Y qué bebieron los xueces? Pos, amás d’agua, sidre. Eso sí, la que ye brut y que provien del llagar d’Emilio Martínez. Asina, per primer vegada, en Salón de Gourmets entamóse un concursu con oríxenes y fuerte presencia asturiana. L’amplia cobertoria mediática, amás de la gran cantidá de públicu asistente, demostraron que si hai unión, puede llegase bien llueñe na gastronomía estatal ya internacional.
