Del 13 al 16 d’abril cellebraráse nel Muséu del Pueblu d’Asturies en Xixón la ochava edición d’esti eventu col qu’arranca la temporada sidrera, que permite esfrutar de la sidre nuevo de más de 70 llagares por namás 5 €, y que vien de ser declaráu d’Arraigu Social pol Ayuntamientu Xixón.
VER SEMEYES / SEMEYES II / SEMEYES III / SEMEYES IV
VER VIDIU / VIDIU II / VIDIU III / VIDIU IV / VIDIU V
LA SIDRA.- Paez qu’entaradaré una entenridá en tornar, pero los amantes de la sidre, la música y bailles del país, de la gastronomía de la nuesa tierra, y cómo non, de la folixa, podrán asistir de nueu al eventu que marca l’entamu de la temporada sidrera asturiana: del 13 al 16 d’abril cellebraráse la VIII Primer Sidre l’Añu. ¿El llugar? Onde siempres, nel inigualable escenariu del Muséu del Pueblu d’Asturies en Xixón.
El xueves 13, a la una la tardi entamará la Primer Sidre l’Añu col pregón qu’esti añu dirá dedicáu a Constantino Ovín, Tino el de La Barraca, emblemáticu presonaxe del mundiu sidreru asturianu recientemente fallecíu, cuntando como d’avezu col apadrinamientu de les confraderíes gastronómiques asturianes, y el culín nagural a cargu del Campión d’Echaores d’Asturies 2016, Salvador Ondó. El preslle sedrá a les 22 hores.
El vienres y el sábadu abriránse les puertes a les doce del meudíi a les 10 de la nuechi, y acoyerán la cellebración del VIII Asturianada y Sidre, que cuntará cola participación de les Escueles de Música Tradicional Manolo Quirós y La Quintana, arriendes de la Escuela Casa La Cultura de Colunga. Arriendes d’ello el vienres recibiráse a los heroicos participantes del Sidracrucis’17 metanes de la so procesión sidrera.
Finalmente, el domingu cellebraráse de les doce a les seyes de la tardi, y acoyerá la llegada de los ciclistes de “30 díis en bici”, siendo amás la entrada llibre pa tolos que lleguen al Muséu del Pueblu d’Asturies en bicicleta. Asina mesmo tendrá llugar el VI Concursu de Sidre Casero fecho en maera, únicu na so especialidá.
Esti añu, la sidre oficial sedrá la del Llagar Buznego –Arroes, Villaviciosa, declarada la Meyor Primer Sidre l’Añu 2017, nun disputadísimu concursu nel que participaron 40 llagares, y onde Sidra Canal quedó en segundu llugar y en terceru, a pre, Sidra Estrada y Sidra Cabueñes.
Per otru llau hai de destacar que se cuntará con sidre’l duernu y sidre ensin alcol, pa facilitar la participación de menores d’edá y d’aquelles presones que prefieran evitar el consumu d’alcol.
Nun faltará la música asturiana, cola presencia de la Bandina Gaites de Noreña, los esportes tradicionales, l’artesanía, les tasties de sidre, y como ca añu, los más piqueños de la casa tendrán un llugar primordial, darréu que deprenderán a mayar mazanes y a facer sidre’l duernu, amás de cuntar con gran cantidá de talleres xuegos tracionales, como la xaronca, tiru cuerda, los bolos o la llave. Darréu qu’un de los oxetivos de la PSLA ye dar puxu al calter familiar del festexu que ye propiu de les espiches.
En cuantes al costu, sigue calteniéndose’l preciu de 5 €, cantidá cola que los asistentes podrán participar en toles iniciatives culturales y prebar la sidre de los más de 70 llagares que participen nel alcuentru.
Per otru llau, el Muséu del Pueblu d’Asturies cunta con gran espaciu d’aparcamientu nel so alrodiu y ta perbien comunicáu per tresporte urbanu, coles llinies 1, 10, 15 o la 20 que lleguen a La Guía.
De nueu la Primer Sidre L’Añu –PSLA- xuncirá aiciones sociales, cultura, tradición y gastronomía pa entamar cola temporada sidrera asturiana, onde podremos esfrutar de la mayor y meyor variedá de sidre qu’esiste n’Asturies y onde los asistentes conviértense nos auténticos protagonistes d’esti alcuentru. Esta cellebración ta entamada pola Fundación Asturies XXI y la revista LA SIDRA, y ye una de les espresiones más rellevantes de la cultura asturiana de la sidre.
