Parayisu ensin gluten. Sidre y celiaquía

La periodista gastronómica Susana Molina fala sobro sidre y celiaquía.

LA SIDRA.- Ca vuelta conocemos más sobro la celiaquía . Y nun ye pa menos. N’Asturies esiste un altu índiz de presones que carecen esta intolerancia. De fecho, Cangas ye un conceyu con muncha prevalencia y calcúlase qu’el 3% de la población ye celíaco lo que triplica la media estatal. El sitiu especializáu www.celicidad.net señala qu’esisten más 130 restoranes ensin gluten nel nuesu país. Hai de destacar –y muncho– que la sidre ye un productu cien per cien llibre de gluten, polo que dir tomar unos culinos enxamás nun supon un problema pa los celíacos.

La periodista gastronómica y especialista en vinu y bébores espirituosas, Susana Molina, respuende al entrugar si se pue consumir sidre: “Sí, ¡poques gracies! Ensin dengún problema, toles sos variedaes: natural, esplumosa, duce… Ye más, cuando escomenzaba a salir y los mios amigos tomaben cerveza, enantes d’escomenzar a tomar vinu -qu’eso vieno dempués-, si había sidre, pidía sidre. Por eso siempres yera una maravía cuando taba per Asturies, tol mundiu pidía sidre, asina qu’ende nun yera la “rarina”. Amás desplica que “atopar facilidaes pa comer ensin gluten pue ser cuasique’l parayísu pa los celíacos (anque ca vuelta ye más fácile), y n’Asturies ye bien fácile. Amás, dende la mio esperiencia, foi una de les zones pioneres. N’Asturies escomencé a ver, primero que n’otros sitios, que los restoranes taben más concenciaos ya informaos sobro la tema. Ye más, la idega del blogue (http://celiacanoesminombre.blogspot.com.es/) surdió precisamente ellí, demientres unes vacaciones de branu en Llastres: que los restoranes tuvieren alternatives ensin gluten, fasta cartes especificando qué llevaba o non gluten, que tuvieren pan ensin gluten, y demás, fixo que demientres el viaxe falárase más sobro la celiaquía y foi onde surdieron les chancies. Asina que pue que sí, qu’Asturies seya una especie de parayísu pa los celíacos y pa la inspiración”.

Ye importante siñalar que pa ufiertar comida pa celíacos ye preciso cuntar con una certificación qu’otorga l’Asociación de Celíacos d’Asturies –ACEPA–. Carlos Celorio, presidente de l’asociación, desplica: “Lo que tienen que faer ye ponese en contautu cola asociación y nós informámoslos de lo qué tienen que faer pa que trabayen d’una manera afayaíza”. Celorio siñala que llograr esti distintivu nun ye complicao, por exemplu, ye la mesma asociación la que se mueve fasta l’establecimientu pa desplicar, in situ, cómo manipoliar, cocinar y sirvir los alimentos pa evitar contaminación cruciada.