Una dellegación de LA SIDRA tuvo visitando llagares en Cornualles y afitando rellaciones.
Cornualles (Kernow), nación celta de Gran Bretaña, tien una bayurosa seique pocu conocía tradición sidrera acullá les sos llendes. Ye ehí, nel oeste la islla onde averóse la dellegación internacional de LA SIDRA pa visitar dellos llagares. Demientres conocíemos más de la cultura del país y almirábemos los sos paisaxes nun pudiemos menos que reconocer la guapura y semeyanza d’estos con Asturies, enllenos de verdi, tarrén asgaya afayaízu pa les pumaraes
Foi en Duloe, nel interior del país onde mos convidaron a visitar el llagar Cornish Orchards (Pumaraes Cornualleses n’inglés), el segundu llagar más importante’l país dientru los 39 qu’esisten. Sicasí ye una empresa xoven, algamó un desendolcu perimportante triplicando la so produición en pocos años y afitando agora mesmo una produición de 3 millones de llitros per añu. Esti bultable espoxigue ye fácile d’atalantar darréu que les sos polítiques miren pol porgüeyu de la comunidá cornuallesa: dende l’entornu de produición caltenible, l’usu de variedaes de mazana llocales, merca direuta a productores llocales y contratación de plantía llariega.
Esti llagar trabaya con 17 variedaes cornualleses de mazana, munches d’elles de mesa, xuntu con delles tribes ingleses concretes (Kingston Black por exemplu) de los condaos d’alrodiu comu Devon o Somerset. Asina’l productu caltién un amiestu de 85% de mazana agridulce xuntu col restu de mazana de mesa de Cornualles.
Los sos principales mercaos de venta son los típicos bares y pubs, de los que la compañía tien en propiedá asgaya. Ye nesi sen onde desendolquen el 80% les sos ventes, siendo l’otru 20% resultáu de les grandes cadenes de supermercaos. Dientru la islla, la so principal zona de distribución ye Londres, siguío de Kernow.
Patrick Gardner, cabezaleru de sofitu empresarial y planificación, foi’l responsable d’ufiertamos candialmente una visita al llagar. “Los pumares son de produición horizontal, con vecería. “Anguañu -siñala Patrick- tenemos una pumarada de 15 acres (unes 6 hectáries) qu’emplegamos pa esperimentar con destremaes mezcles de variedaes y asina algamar un bon resultáu y aporta-y matices a la bébora”.
Dempués d’esta perguapa visita encamentamos a toos a conocer les sidres de Cornualles ya especialmente les de Cornish Orchards pola so alta calidá ya fuerte calter identitariu. Pa los amantes de les sidres internacionales sedrá tou un descubrimientu y asperamos velos nel Salón Internacional de les Sidres de Gala d’esti añu (SISGA).
