Estes declaraciones istitucionales son clares amueses de sofitu pa que la nuesa bébora patria seya reconocía como Padremuñu Cultural Inmaterial de la Humanidá.
LA SIDRA.- Foi Somos Mieres quien fai casi una selmana presentó una moción pa que la sidre fuere declarada como bébora istitucional de Mieres del Camín. Dicha moción foi sofitada pol restu los partíos políticos, con esceición del PP. Agora, el presidente de Foro Mieres Rogelio Muñiz, grupu qu’anguaño nun cunta con representación municipal, refrendó la moción. Aduz motivos culturales, económicos y turísticos; y señala qu’el so partíu siempres sofitó la so promoción.
“La sidre tien que recibir el sofitu del Conceyu de Mieres, dientru de les competencies que-y correspuenden en materia de fomentu y promoción de los productos asturianos. Foro Mieres amiéstase a la declaración de que la sidre natural seya la bébora istitucional en Mieres y se promueva como bien inmaterial de Padremuñu de la Humanidá. La sidre natural supon un potente elementu de promoción turístico que s’atopa en puxanza y Mieres nun pue dexar pasar esti reclamu como fonte de riqueza” señaló nun comunicáu que puede consultase na páxina ueb del partíu.
Ca vegada se fai más patente que la sidre ta presente en tolos niveles sociales del nuesu país, ye parte fundamental de la identidá asturiana y ye ún de los sos principales atractivos a nivel internacional. Hai que recordar que nel 2015 la sidre foi declarada bébora oficial del Conceyu de Xixón, declaración a istancies de la Fundación Asturies XXI. Aiciones como estes demuestren que ca vegada más la esfera política faise ecu de les reivindicaciones sobro la sidre y la so relevancia n’Asturies.
