L’añu escomenzó cola sospresa de la presencia d’un echaor de sidre xaponés en Xixón, en concreto en Casa Trabanco en Llavandera.
LA SIDRA.- La hestoria comenzó hai poco menos d’un añu cuando un matrimoniu xaponés namoráu de la Península abrió en Tokiyo el restorán Camino de Santiago.
Demientres estos díis tanto los propietarios como’l so encargáu y cocineru, Yanagida Taisuke, tan visitando Asturies pa conocer un poco meyor la nuesa gastronomía y la cultura asturiana de la sidre. Dende va unos meses importen Sidra Trabanco en Tokyo y agora vinieren pa conocer les istalaciones y tol procesu d’ellaboración.
La sospresa llegó cuando tres ver el chigre de Llavandera solicitaron a la so xerente, Yolanda Trabanco, que l’echaor xaponés quedare ellí unos díis pa deprender a echar bien la sidre y a cocinar fabada, cachopu, cebolles rellenes y arroz con llechi… Yolanda atendió la petición porque camienta que “tolo que seya promocionar la nuesa gastronomía y la nuesa cultura ye bono p’Asturies”. El casu ye qu’echar sidre dióse-y perbien “paez que lleva equí tola vida” comenta Yolanda.
De magar el mes que vien, la gastronomía asturiana tendrá más protagonismu nesti restorán de Tokyo, qu’aspira a convertise nel nuesu referente nel país nipón. L’anéudota ye que naide nun foi quien a deprender el so nome y acabaren bautizándolu como Taichán.
