La Guía Chigrín otorgó’l gallardón a dicha sidrería, ente otres xides pol cuidu y mimu que dan a la nuesa bébora tradicional.
LA SIDRA.- El xuráu de la Guía Chigrín escoyó a Casa Trabanco asitiáu en Llavandera como meyor Chigre d’Asturies 2016. Yolanda Trabanco, xerente del llagar aseguró que parte del ésitu ye “cuntar con bonos echaores y acoricar la sidrE Trabanco que sirvimos”. Coles mesmes señaló la importancia de cuntar con güerta propia, el “siguir calteniendo la chuleta y el bacalláu que mos fexo populare, y siguir prauticando’l km 0 buscando provisores de l’aldega y contorna”. Amás dixo, “cúriase’l bolsu del veceru, lo cual ye importante”.
El fallu tuvo llugar nel Llagar El Güelu en Pruvia. Dende la organización siñalaron: “Anque tolos miembros del xuráu tienen una perllarga trayeutoria como espertos gastronómicos, nun-yos resultó ná cenciello decantase yá que la calidá de los candidatos finalistes raspiaba la perfeición”.
Los miembros del xuráu fueron: Antonio Virgili como presidente del Tribunal y que ye Direutor Xeneral de RTPA; Luis Alberto Martínez, xef y propietariu del Restorán Casa Fermín d’Uviéu; Pedro Morán, chef y propietariu del Restorán Casa Gerardo; Esther Manzano xef y propietaria del Restorán La Salar; Antonio Bascarán oftalmólogu y confradere mayor de la Confradería d’Amigos del Quesu; Sonia Fidalgo presentadora de TPA y confradere d’honor de los Siceratores d’Asturies; y Jesús Pedro, músicu y presentador de TPA.
Casa Trabanco ye un llagar tradicional con más de 30 años d’hestoria familiar y que vien complementar el prestíu y calidá yá consolidada d’una marca de sidre como ye Sidra Trabanco. “Ye un chigre onde inda los vecinos pueden dir echar la partía o onde tomen el “cafetín” dempués del entierru” señaló Yolanda.
