Los encargaos de dar el cursu fueron Enrique Tuya y Loreto García; l’augua nun torgó que los participantes recibieren el taller.
LA SIDRE.- Ayeri tuvo llugar nel Campu Valdes el cursu d’echar sidre que patrocina JR enmarcáu na XXV Fiesta de la Sidre de Xixón. Nelli participaron 30 presones que s’inscribieron con antemanamientu, amás d’otros 30 espectadores, aprosimao, que tamién s’averaron fasta la plaza allugada cerca de la Ilesia de San Pedro. L’augua nun foi torga por que los asistentes decidieren recibir el taller. Y eso que se-yos entrugó siqueríen aplazala pa otru díi.
Los encargaos de dar esti cursu d’echáu fueron Enrique Tuya, Coordinador del Campionatu Oficial d’Echaores; y la varies vegaes ganadora de concursos d’echáu, Loreto Garcia, al mandu de la sidrería El Madreñeru y Manolo Jalín
La clase foi teórico-práutica. Nella enseñaron les bases pa que la sidre seya bien echada. L’oxetivu ye poder esfrutar de toles propiedaes que mos ufierta; y pa ello, la forma de bebela ye esencial. Asina, ensiñóse la importancia d’alzar bien el brazu que sostien la botella, el movimientu de muñeca, cómo garrar el vasu, la posición del les piernes, qué faer col corchu, cómo escomenzar a echar la sidre o la importancia de cortar el remexu ensin que se machuque la sidre.
Per otru llau, ufiertáronse conceutos teóricos del echáu como la temperatura a la que tien de tar la sidre, la diferencia ente la densidá de la sidre con respeutu al augua, qué ye’l espalme, el pegue y l’aguante; o les cualidaes organoléptiques que tenemos de tener en cuenta.
