El Concursu de Sidre Casero de Villaviciosa cuntó cola participación de 90 llagares del conceyu qu’ufrieron una sidre d’impresionante calidá.
LA SIDRA.- Con trunfu de Juan Martino seguíu del Marcelino Prida ya Isidoro Granja, el Concursu de Sidre Casero de Villaviciosa foi impresionante, non solo pol elleváu númberu de participantes -90!!!-, que da idega de la vitalidá de la sidre nel conceyu maliayu, sinon tamién y sobro too pola impresionante calidá de les sidres presentaes que supunxeron una auténtica llamada d’atención frente al llamentable procesu d’uniformización que carez la sidre industrial nos tiempos caberos..
Sidres con saborgos estremaos, con amargos, altes de collor, con espalmes estremaos… con defeutos tamién, por supuestu, pero sobro too con carauter, mui lloñe del saborgu aciduláu, suaviquín, al que paecen tar apuntaes les sidres de los más de los llagares industriales. La diversidá comu carauterística, los saborgos complexos ¡los amargos! tan abegosos d’atopar agora mesmo… una auténtica esibición de lo que ye la sidre asturiano.
Muncha xente y perbon ambiente, con más de 1.500 vasos vendíos, lo que supón una asistencia de más de 3.000 presones, munches cares conocíes, de llagares industriales como María Cardín, Consuelo Busto, J. Piñera… y d’amantes de la sidre que, por supuestu, nun pudieron dexar de tar presentes nesti estupendu eventu.
Pa qu’ello fuere posible hai d’agradecer l’enfotu de l’Asociación pal Fomentu de la Sidre Tradicional Asturiana y la collaboración de los llagareros participantes, que punxeron de baldre dos caxes y media de sidre pa esfrute de los asistentes.
Pal mes que vien cellebraráse, tamién na Plaza’l Güevu de Villaviciosa, el Concursu de Sidre Casero d’Asturies, que viendo comu resultó esti de Villaviciosa, sedrá d’asistencia obligao.
