Los Gastrónomos del Yumay cellebren ún de los sos alcuentros estrella con nomamientu de confráderes y presentando les sos Xornaes Internacionales Grande Covián.
LA SIDRA.- Ayeri tuvo llugar la presentación de les Xornaes Internacionales del Xamón Ibéricu ‘Grande Covián’ entamaes pola confradería de los Gastrónomos del Yumay. Esta presentación sirvió de marcu pa nomar a los nuevos confráderes d’honor y de méritu que la hermandá otorga cada añu. L’alcalde de Colunga, Rogelio Pando, foi nomáu confrádere d’Honor; ente que l’empresariu Gerardo Oter y la so esposa Teresa Torre fueron nomaos confrádere s de Méritu.
A esti alcuentru asistieron representantes de gran parte de les hermandaes gastronómiques asturianes y pudieron tastiase los cuatro DO de xamón ibériques españoles y una de Portugal: Xamón Dehesa d’Estremadura, Xamón de Guijuelo, Xamón 5J de Jabugo, Xamón Los Pedores de Córdoba y Presunto de Ribayos.
“La sidre asturiano ye un productu fantásticu. Sicasí, lo que yo veo ye que la sidre ye un productu qu’en Madrid nun se cotiza bien alto y por eso’l restu de la hostelería nun intenta trabayala, porque los marxes son bien piqueños. Una botella de cerveza cóbrase cuasi comu una de sidre. Por eso creo qu’habría que da-y más prestíu a la sidre, da-y más categoría por que xubiera. Creo qu’habría que cobrala un pocuñín cara” aconseyó Gerardo Oter, empresariu al mandu de un conglomeráu con más de 24 llocales en Madrid.
“Cuandu te reconocen fora del to conceyu ye una gran honor. Amás de poder compartir esta allegría colos Gastrónomos del Yumay y con prácticamente toles confraderies d’Asturies. Yo represento una villa onde hebio un gran gastrónomu como lo foi Grande Covián y poro, repito, ye un honor. Asturies tocantes a sidre ta a un gran nivel, pienso que ca añu va superándose. Yo allego a tolos certames, voi a toles presentaciones y crié nuna casa onde siempres se fabricó sidre. Por tantu considero que la nuesa bébora tradicional tien un gran nivel y que fora de les nueses fronteres ta marcándose oxetivos pal so xorrecimientu. Pero la sidre asturiano va ser la meyor tea onde tea” afirmó l’alcalde de Colunga.
