L’importaor y distribuidor de sidres estauxunidense James Asbel comenta nun artículu cómu s’aprecia la nuesa bébora tradicional nel so país.
LA SIDRA.- James Asbel ye’l fundaor de ‘Ciders of Spain’, un espaciu online dedicáu a la importación y distribución de sidres. Na so ueb puen atopase una amplia gama de sidres tradicionales asturianes y de nueva espresión. Pola so trayeutoria, Asbel convirtióse nun bon conocedor de la nuesa bébora patrio y por ello ufiértamos una desplicación sobro cómo s’aprecia la sidre nos Estaos Xuníos.
“Cuandu los norteamericanos preben la sidre tradicional, describenla comu ‘funky’ ¿Por qué? Bona cuestión. Esta pallabra nun ye mui enolóxica que digamos. Fai referencia al arume de la formientaura malolláctica. Hai que siñalar que ‘funky’ sinifica, o tien una acepción, de golor un pocu a animal o a sudu. L’alternativa a esta descripción ye ‘horse blanket’ –cobertor de caballu–. Esta pallabra ye la más, digamos, oficial de la llista d’arumes organolépticos. (A min, presonalmente, esa pallabra nun me disgusta, a la escontra, ye positiva. Recuérdame’l mio primer tragu de sidre va munchos años. Alcordanza que me dio la sensación del tienru afalagu del focico d’un caballu).
La pallabra ‘funky’ toca un elementu intercultural col que tratamos davezu pa vender la sidre. El so arume nun ye ná familiar al norteamericanu y ye raru nel ámbitu culinariu. Por eso ufierta un ciertu retu pa introducir la sidre natural. Pero hai que dicir que, comu toa novedá, llama l’atención de los aventureros que declaren la so afición con arguyu. Y la pallabra de moda pa ellos ye, xustamente, ‘funky’. Hai que siñalar qu’ellos utilícenla tantu pal arume malollácticu comu pal qu’esprenden los brettanomyces (hongos qu’intervienen na ellaboración de cerveza) qu’agora ta tamién de moda pola afición, ca vegada con más puxu, de les cerveces agries belgues o ‘Belgian Sours. Y ye por esti motivu que de cutio tenemos que tar desplicando que na sidre nun intervienen los citaos brettanomyces’.
Comu nota cultural más amplia, la pallabra ‘funk’ vien de los años 60 y 70. Ye un estilu de música popular empecipiáu polos ciudadanos afroamericanos. Dicha pallabra foi concebía polos mesmos músicos. Esta idega pamique tamién pue treslladase al conceutu de ‘salsia, música compuesta con dellos ingredientes que-y apurren riqueza cultural propia. De manera que ‘funky’ tien una conotación bien positiva: de bébora golioso que provien d’una fonte visceral d’arte popular”
