ENTAMU
Algamar el númberu 150 de la nuesa revista ye un nueu fitu que tamos arguyosos de compartir con toes aquelles presones que lo fexeren posible gracies a la so collaboración, bien nel trabayu diariu de la propia edición, nel aporte d’información, na distribuición o favoreciendo la so viabilidá económico escoyéndomos comu mediu afayaízu pa dar a conocer los productos y servicios qu’ufierten.
Nestos cuasique 13 años de vida’l nuesu progresu superó les meyores espeutatives. Aumentemos tirada, númberu de páxines, conteníos, calidá, distribución… y sobro too fuimos evolucionando paralelamente col seutor sidreru y col conxuntu de la sociedá asturiana, ca vuelta más comprometía con tolo que ye la so bébora patria y progresiblemente más abierto al panorama internacional y a la interesantísima evolución de la sidre, con nuevos productos, ca vegada mayores calidaes y enartada dafechu cola gastronomía de calidá.
Yá naide piensa na sidre comu una bébora de segunda, una bébora apta namás comu aperitivu mentes llega’l momentu de pasar a la comida, yá con productos “más serios”, comu se consideraba al vinu o’l xampán. Anguañu la sidre va recuperando gradualmente’l so papel preponderante nes meyores meses del país, con importantes empreses agroalimentaries y grandes xefs implicaos dafechu na so utilización, tantu na ellaboración de platos comu na so correcha harmonización. Queremos creyer que LA SIDRA, comu mediu de comunicación, tamién contribuyere a ello.
Nesti tiempu xorrecimos, caltuvimos nes nueses páxines importantes firmes y amestemos nuevos profesionales con nuevos enfoques. Fueren munches les presones que d’una forma o otra collaboraren con nós, aportando lo meyor de sigo. A toos ellos gracies, porque mos aidaron a meyorar nesti indispensale trabayu n’equipu.
Y con esi bagaxe, y con esi espíritu, editamos esti númberu 150, nun mes nel que la presentación de la nueva collecha de la DOP y l’anunciu del Festival de la Sidra de Nava aváncensemos comu augurios de los bonos tiempos que tamos viviendo y que seguiremos esfrutando.
