Son datos del 2015 apurríos por una investigación d’Euromonitor International
LA SIDRA.- El consumu de bébores alcóliques a nivel mundial esperimentó nel añu pasáu un descensu del 0,7%. Un datu negativu que nun se presentó en más de diez años. Sicasí, la sidre sigue teniendo bona aceptación nel mercáu. Nos postreros años esperimentó un xorrecimientu sostenible, y anque nel 2015 ésti suavizó daqué, la nuesa emblemática bébora sigue consolidándose nel mercáu internacional.
Tornando al seutor de les bébores alcóliques, China, Brasil y países d’Europa del Este fueron los que más apuraron el descensu de consumu. Pero hai de destacar que n’América del Norte hebio un xorrecimientu del 2,3% con respeutu al 2014, y un aumentu del 0,7 tamién n’América Llatina.
Estos datos amuesen que los postreros territorios son propicios pal mercáu de la sidre. Exemplu d’ello ye’l consorciu “Asturies for foodies” d’esportación formáu por Grupu Trabanco, Conserves Agromar y Agrovaldés. Tres empreses que se xunieron pa buscar una mayor implantación nel mercáu estaoxunidense, que sigún indiquen, “ta en puxanza”.
