ENTAMU
La presentación de la nueva collecha de la Sidre d’Escoyeta marca de forma nidia l’actualidá sidrera d’esti mes. Esta marca de calidá sigue ufiertándomos non solo una bona sidre sinón, frmientres estos trés meses, la oportunidá d’esfrutar de la so primer sidre l’añu, la sidre sobre la madres. Un tipu de sidre qu’adulces va recuperándose y alquiriendo ca vegada mayor importancia.
Pero hai más, esta Sidre d’Escoyeta ufiértamos tamién la posibilidá de ser solidarios, darréu que ca botella consumía va suponer una collaboración cola Fundación Sandra Ibarra de Solidaridá Frente al cancanu. Una estupenda iniciativa que yá va años lleven desendolcando y que nesta ocasión fixeron estensiva a los consumidores. La sidre ye sociedá, y na sociedá la solidaridá ye obligación.
Tamién ye de destacar la importante presencia asturiana n’Alimentaria, de la sidre sobromanera, anque paez que teamos llueñe de consiguir un espaciu propiu, una Intersidre, y el stand del “Principado” superara los piores pronósticos. El seutor agroalimentariu asturianu gocia de bona salú. Hai calidá, hai orixinalidá, hai inovación. Hai futuru.
Per otra parte LA SIDRA llevó la sidre asturiano al Festival Internacional de la Sidre de Rotterdam, y presentó la prósima edición del Salón Internacional de les Sidres de Gala en Barcelona… y anunciamos novedaes. Va haber qu’esperar un pocu pero bien llueu vamos poder anunciar nueves y gratificantes novedaes rellacionaes, cómu non, cola sidre.
No demás tamos nuna estación afortunada, na que podemos esfrutar de la sidre nuevo mentes los pumares en flor recuérdenmos que’l ciclu sigue, los merenderos tresverten nes xornaes nes que’l sol hónranos más o menos cola so presencia y les fiestes de pueblos, villes y ciudaes enllénense de sidre. Gascona, comu non mentar la so magnífica “preba” de la sidre, una referencia sidrera de primer orde nel nuesu país y que tuviera de plantegase seriamente internacionalizase.
Por supuestu, la situación del Muséu de la Sidre de Nava sigue ensin esclariase y la presentación de la cultura asturiana de la sidre énte la UNESCO comu Patrimoniu imaterial de la Humanidá sigue nel llimbu. La vida sigue.
