Na sidrería cayeron tres de los premios del concursu “Destín sidreru” incluyíu’l viaxe a Frankfut.
LA SIDRA.- Cuasi que nun lo creen na sidrería La Mazana Real cuandu una de les sos veceres, Graciela Pasi, anunció-yos por mediu d’un grupu de Whatsapp que ganara ‘el gordu’ del concursu “Destín sidreru” de Trabanco: un viaxe a Frankfurt acompangada d’una presona. “Avisóla la radio, llamáronla por teléfonu cuando taben en directu” rellata Sebastián Vaz, que xunto cola so ma Patricia Soria, ta al frente del establecimientu. “Dempués de colgar fui darréu pa la sidrería a festexalo” complementa ente risa Graciela. Amás, Sidra Trabanco convidóla xunta con Sebastián y a Patricia, a conocer el llagar.
Nel so percorríu cuntaron con unos guíes d’esceición, Lorenzo Trabanco, Emilio M. Trabanco y Jorge Tuya, que-yos desplicaron pasu ente pasu la ellaboración de la bébora tradicional. Dempués, el grupu treslladose a El Túnel, un llagar qu’ocupa un antiguu pasaxe ferroviariu. Ende esperábalos Samuel Trabanco pa compartir con ellos una espicha y unos culinos de sidre. “Dar un premiu a una muyer como Graciela, que me diz que va dir col so fíu, ¿Cómu voi sentime? Pos encantáu” sopelexó.
