El prósimu sábadu 7 de mayu tendrá llugar nos llocales de la Fundación Asturies XXI una tastia guiada de sidre irlandés, xaponés y portugués.
LA SIDRA.- Dientru la dinámica de dir dando a conocer sidres d’otres naciones, esti prósimu sábadu 7 de mayu, a les 12 del meudíi ta convocada una tastia de sidre irlandés: Finnbarra (brut y semiseca); portugués: Corrupia; y xaponés: Tamura Cidre (brut). Trátense de sidres daqué estremaes a les que tamos avezaos, y coles que probatiblemente podamos contar na edición del SISGA’16, y que se presenten agora nuna xornada de tastia específica, na que participará Donato Xuaquín Villoria, collaboraor de LA SIDRA, que compartirá colos asistentes impresiones y opiniones.
La internacionalización de la sidre, y la ca vuelta mayor interés por conocer qué se ta faciendo notros países, fai qu’estes tasties seyan perinteresantes, permitiendo ampliar la conocencia de la sidre en toles sos posibles espresiones.
La tastia tendrá llugar nos llocales de la Fundación Asturies XXI (Prendes Pando 11- Xixón) y l’asistencia ye llimitada y per rigurosu orde d’iscripción, siendo preciso apuntase previamente, bien al mail administracion@lasidra.as, o al teléfonu 652594983. El preciu ye de 5 €, y de 3 € pa soscritores o collaboraores de LA SIDRA.
