El Cenador del Azul, El Duque y El Llagarón fueron los establecimientos reconocíos el 19 d’abril.
LA SIDRA.- Tres restoranes fueron gallardonaos colos premios Platos d’Oru, otorgaos dende 1985 y aniciaos per Radio Turismu. El so oxetivu: incentivar y reconocer el llabor de los profesionales de la gastronomía. Los premiaos fueron El Cenador del Azul, de Mieres del Camín; El Duque de Xixón; y El Llagarón de Candás.
L’actu cellebróse a les siete y media la tardi nel Salón de Plenos del Conceyu de Mieres del Camín, y a elli asistieron Carlos Guardado, comendador en Asturies de la confradería enantes citada; José Luis Álvarez Almeida, presidente executivu de Otea; y Diana López Antuña; conceyala de Turismu, Comerciu y Festexos de Mieres del Camín. Tamién allegaron miembros y alcaldes d’otres corporaciones municipales asturianes, compañeros del seutor, medios de comunicación –ente ellos el críticu gastronómicu Eufasio Sáchez–; y representantes d’hermandaes gastronómiques comu les de La Pegarata, del Desarme d’Uviéu, del Clú de Les Guisanderes, o de los Oricios de Xixón. “Cellebremos la entrega de premios equí porque ye l’habitación más importante que tien el conceyu“ siñaló Carlos Guardado.
Los motivos polos que los trés establecimientos recibieron los Platos d’Oru” fueron desplicaos y glosaos pola periodista d’El Comerciu Leticia Álvarez, pola cronista oficial d’Asturies, María Josefa Sanz; y pola presidenta del Clú de Les Guisanderes. Álvarez destacó de María y Pedro Baldó, d’El Duque: “Miles de pareyes asturianes cellebren ende les sos llacuaes de boda“. Pela so parte, María Baldó, emocionada, indicó que “ye un arguyu y suerte tener esta reconocencia ente les manes“. Sanz recordó que Luis Bolado Calderón d’El Llagarón: “deprendió dende embaxo, comu neñu escomenzó a barrer serrín y a trayer les servilletes. Y tamién a echar bien la sidre”. A lo cabero, la presidenta del Clú de Les Guisanderes, Amada Álvarez Pico, reseñó sobro José Luis Mondelo Paradelo d’El Cenador del Azul. “Trabayó ensin parar fasta algamar ser un referente n’Asturies”.
