Pablo Álvarez ganó el LXII Concursu Nacional d’Echaores y Moisés Martínez y Fernando Redón quedaron a pre comu campiones na llocal.
LA SIDRA.- La XX Fiesta de la Sidre de La Felguera cuntó cola collaboración desinteresao de 14 llagares, que punxeron caún alrodiu de 20 caxes de sidre a dimposición de los sidreros que participaren na preba, que se cellebró nuna carpa istalada nel parque Dolores Fernández Duro, y que cuntó con una perimportante asistencia d’amantes de la sidre, qu’esfrutaron en condiciones d’esta guapa polixa sidrera.
La sidre del Llagar Alonso foi la ganaora del xuráu popular, y la del Llagar Castañón ganó’l premiu del Xuráu, nun eventu, entamáu pola Sociedá de Festeyos y Cultura San Pedro, que comu davezu, cuntó con un vasu xerigrafiáu con un dibuxu del antiguu mercáu de La Felguera, y con cuya merca podía prebase tola sidre que se quinxere.
En cuantes al Concursu Nacional d’Echaores, el más antigüu esistente, foi ganáu por Pablo Álvarez, de Sidrería Alberto (Uviéu), seguíu por Jonathan Trabanco, d’El Madreñeru (La Pola Sieru) y Wilkin Aquiles y Jorger Vargas d’El Otru Mallu (Xixón), na categoría llocal quedaren a pre Moisés Martínez, d’El Yantar d’Aldea y Fernando Redón, de Casa Nardo.
