La conseyera de Desendolcu Rural echa balones fuera y fala de caltener el Muséu ensin aportar fondos.
LA SIDRE.- L’estilu “Principado” impónse. La rempuesta de la conseyera de Desendolcu Rural y Recursos Naturales, María Jesús Álvarez ye un exemplu perfechu de nun dicir ná, o pior, dicir lo que nin ye nin dexa de ser, y por supuestu, de nun faer un res.
Y ye qu’a la entruga del diputáu del PP, Pedro Rueda, plantegando la necesidá de dar una salida un muséu “que nun se sabe au va”; Mª Jesús Álvarez sopelexó que’l “Principado” trabaya pol oxetivu d’asegurar el caltenimientu del Muséu de la Sidre de Nava, y achaca la cris a les dificultaes económiques que fixeron que’l númberu de visites baxara considerablemente, afirmando que la solución nun pasa por aportar más fondos.
Del incumplimientu de los compromisos económicos del “Principado” pa col Muséu de la Sidre, y de la so responsabilidá na xestión del mesmu y na ausencia d’una política nidia y una planificación a mediu y llargu plaza, ná de ná. Bones pallabres “toos tamos por caltener el muséu”, ensin dengún conteníu y tovía menos autocrítica.
“Principado” 100%.
