El Grupu de Baille Tradicional Fitoria cellebra la so XIII Espicha Tradicional esti 16 d’abril
LA SIDRA.- Lo que nun entamu foi una espicha privada fecha nun llocal zarráu, ye anguañu un eventu clásicu de la primavera. Gracies a la collaboración desinteresao de cuantos pasaren pel escenariu de la Espicha Tradicional de Fitoria pudo caltenese añu ente añu esta cellebración popular, cuyos ingresos empobínense íntegramente al entamu de la Nueche Folk de Fitoria que tolos años tien llugar la primer fin de selmana de xunetu.
Nesta decimo tercer edición el grupu promociona la espicha cola rialización de vidios-parodia de películes de terror, en castellán y n’asturianu que puen vese na so páxina de Facebook.
Na espicha actuará la Banda Gaites Llariegu y tou aquelli que quiera xubir al escenariu llibre que s’abrirá darréu. Tolos participantes nel escenariu llibre sedrán invitaos a una consumición.
El preciu de les entraes (inclúi xinta) ye de 15 €, con un descuentu de 3 € pa los menores de 12 años.
Demientres la espicha sortearánse daos por valor de más de 450 € gracies a la collaboración de tiendes, comercios, clíniques, restoranes y hoteles de too Asturies.
La espicha cellebraráse’l 16 d’abril de magar les 21:30 nuna carpa istalada al delláu de les Torres de Pando (Uviéu)
