La dellegación de la revista LA SIDRA, Fundación Asturies XXI, participó na xornada de güei nel Apfelwein Tour y esta nuechi participará na Cena Gala onde s’entregarán los premios Pomme d’Or.
LA SIDRA.- L’atención de los anfitriones, entamaores del Apfelwein Weltweit permitió a les dellegaciones participantes nel mencionáu eventu sidreru conocer parte de la perimportante cultura sidrera de Hessen, con visita al restorán de Schuch en Parunheim, onde pudiemos prebar una sidre percreativa y una cocina anovaora y una visita al llagar y preba de les orixinales sidres qu’ellaboren, de la man del propiu llagareru que tuvo l’atención d’atender presonalmente a la comitiva.
Pela tardi, dempués de visitar el cascu hestóricu de Frankfurt, catedral del emperador y l’hestóricu Römer, visitóse l’Apfelweinkontor, onde pudieren degustase toa triba de sidres, y onde s’atopó sidre asturiano de Buznego.
Esta nuechi tendrá llugar la Cena Gala, nel Grandhotel Hessischer Hof, nel trescursu de la cuala tendrá llugar la entrega de los premios Pomme d’Or, qu’esti añu distinguió a tres sidres del llagar de Trabanco: Ávalon, Poma Áurea y Llagar de Camín.
