Concedía por Sidrastur, nel diseñu muéstrase la imaxe de Guillermina, güela de los propietarios y un “homenaxe” a la xente del campu asturianu.
LA SIDRA.- El llagar Pamirandi fo’l ganaor de la I edición de la etiqueta más guapina d’Asturies. Nesta adícase la imaxe d’una sorriente Guillermina, güela de los propietarios del llagar Javier y Manolo Niembro. Dambos, xunto col diseñaor Fran Miranda, llevaron a cabu esta idega qu’agora foi premiada pol Grupu Sidrastur. “Queríemos facer un homenaxe a la xente del campu, que ta representada na imaxe de la nuesa güela. Que cuandu daquién tome una botella y vea esa etiqueta,,, tresmíta-y allegría. Porque Guillermina ye l’exemplu d’una muyer campesina que yera feliz na so tiera, esi yera’l so mou de vida” desplicó Javier demientres l’eventu.
La entrega’l premiu llevóse a cabu’l pasáu 5 de marzu teniendo comu escenariu la sidrería El Culete de Xixón n’ónde dempués celebróse la comida añal de l’asociación. Hai de siñalar qu’enantes entregábense más d’estos gallardones, darréu que les etiquetes separtábense per Conceyos, y asina salén varies premiaes. Pero de magar agora, namás se fai una sola votación pa escoyer “la más guapina” de toa Asturies. “Enantes non tolos llagares teníen opción a participar, d’esta miente podemos abarcalos a toos”, siñaló Javier Carriles, presidente de Sidrastur.
