El presidente del “Principado” felicita les fiestes en 14 llingües, y denguna d’elles ye l’idioma del país del que ye presidente ¿Qué nun fadrá cola sidre?
LA SIDRA.- Dende LA SIDRA cuantayá que llevamos afirmando que’l reiteráu dispreciu del “Principado” a la sidre recurriendo sistemática y únicamente al “vinu español” nos actos oficiales nun yera namás una agresión a la nuesa bébora patria, sinon al conxuntu de la sociedá asturiana y a too aquelli o aquello que tea daqué d’asturianu, anque namás fuere porque de ser namás por odiu a la sidre, bien podíen recurrir al tamién asturianu vinu de Cangas.
Pos bien, el presidente d’esa isititución qu’a los asturianos enxamás naide nun mos permitió votar, vien d’unviar una tarxeta navidiega felicitando les fiestes en 14 llingües, y denguna d’elles ye l’asturianu, l’idioma del país del que ye presidente. Quien asina disprecia la nuesa llingua ¿Qué nun va facer cola nuesa sidre?.
L’autoodiu y el cosmopaletismu del que fai gala’l “Principado” ye inxustificable dafechu; cierto que tienen que llidiar con una Asturies que nun ye’l barriu de Madrid que quinxeren, que tien sidre en cuentes de vinu, que toca la gaita y non la guitarra, que bailla asturianu y non flamenco, qu’enxamás nun-y gustaron los toros, que fala nuna llingua propia…. pero nin asina tien xacíu esos comportamientos asturfóbicos.
Asturies ye cosa de toos y toes, y espérase de los asturianos el natural ciñu y apreciu polo propio ¿Estos del “Principado” qué son? ¿principadianos?
