Mañana xueves entama la cuarta edición del Cancios de Chigre en Gascona.
LA SIDRA.- Pesia la llexislación d’espeutáculos públicos del “Principado” que prohibe canciar nes sidreríes y restu d’establecimientos hosteleros, cola mui asturiana esceición de los tablaos flamencos, que sí tan autorizaos, cuatru de los chigres de Gascona (La Manzana, La Pumarada, Tierra Astur Parrilla y Villaviciosa) escomiencen esti xueves la cuarta amuesa “Cancios de Chigre na Gascona” que continuará tolos xueves fasta’l prósimu mes d’abril.
Esti xueves, a les 20:30, intervendrá’l popular grupu polesu El Ñeru de Ra en La Manzana; l’Ochote Asturias en La Pumarada; el grupu Los Ñervatos en Tierra Astur Parrilla y la Bandina de Llieres na Sidreria Villaviciosa. Fasta 16 coros, coriquinos, grupos y bandines, tarán presentes nesta muesa con cancios populares del país, más otros estilos musicales, dende la canción marinera a les habaneres, too ello empobinao a canciar y esfrutar de la tardi y nuechi del xueves nel “bulevar de la sidre”.
