Cola Xornada de Sumilleres, empobinada a los profesionales del seutor, el V SISGA punxo puntu final a les sos actividaes, con unos inmeyorables resultaos.
LA SIDRA.- Na xornada de sumilleres, desendolcada na mañana de güei nel Llagar de Bernueces, los profesionales del seutor rializaren una tastia compartida de la sidre gallardonao colos premios SISGA’15, y punxeron en común los ellementos de valoración de les sidres d’alcuerdu a les estremaes sensibilidaes esistentes en ca país productor de sidre.
Nesi sen, y arriendes de les valoraciones del productu, la so ellaboración, el so percorríu y los posibles maridaxes, tamién se faló de la necesidá d’harmonizar criterios ente los sumilleres de la sidre a nivel internacional y de cuntar con una llexislación común europea que permita a la sidre cuntar colos sofitos económicos colos qu’agora mesmo cunta’l vinu, y que-y permiten aceder añalmente a sovenciones de cientos de millones.
Pelo demás, acabante de finar esti V SISGA, yá tan poniéndose les bases pal del añu que vien, coles nueves esperiencies, y coles propuestes que se fueron recoyendo, pa facer que de nueu Xixón torne a ser la capital mundial de la sidre, cola presencia y participación de los meyores llagares del mundiu.
