A falta cellebrase la Xornada de Sumilleres, el V SISGA supera les meyores espeutatives.
LA SIDRA.- La élite de les sidres de copa d’Europa, los llagares más anovadores y de mayor calidá, la escelencia gastronómica del Restorán El Duque, y la participación de cientos d’amantes de la sidre tan faciendo d’esti V SISGA un ésitu que supera les meyores espeutatives, con récord de participación internacional y con les sidres de más calidá esistentes agora mesmo nel mercáu.
Los premios SISGA’15 pel so llau truxeron abondes sospreses, con importantes ésitos de los llagares asturianos de Panizales, Mayador, Viuda de Angelón, Riestra, Norniella y Cortina, qu’algamaron los primeros puestos nes sos respeutives categoríes, compitiendo con un perimportante representación internacional, y con un xuráu nel que la composición asturiana yera de 3 de los 15 participantes, lo que da una idega pernidia de la calidá d’estos premios, y por supuestu de la de les sidres ganaores.
De la Cena Gala ufiertada pol Restorán El Duque, con un peracertáu maridaxe de les sidres colos platos, hai tantu que dicir que namás vamos remitimos al artículu que saldrá al respeutu na prósima edición de LA SIDRA… y de la Xornada de Tastia Abierta, vala dicir que pasaren pellí alrodiu del millar de presones que nun quinxeron perder esta oportunidá única de tener acesu a esta variedá de productos sidreros d’impresionante calidá y escelente presentación.
La xornada de mañana ta dedicao espresamente a los sumilleres, que fadrán una tastia compartida de les sidres ganaores, asina cumu del Vinagre Geri, vinagre balsámicu de sidre, avieyáu en barica de carbayu 15 años, y que despertó enforma interés na Xornada de Tastia Abierta y nel Xuráu de los premios SISGA
