Los prósimos 30, 31 d’ochobre y 2 de payares cellebraráse la edición más internacional fasta agora del Salón Internacional de les Sidres de Gala (SISGA). La Cena Gala tendrá llugar nel Rest. El Duque, y la Tastia Abierta tendrá comu escenariu l’incomparable marcu qu’ufre’l Centru de Cultura Antiguu Istitutu de Xixón.
LA SIDRA.- Añu ente añu, el SISGA va medrando en númberu de participantes internacinales, cuntándose pa esta edición cola presencia de llagareros de Suecia, Eslovaquia, Chequia, Irlanda, Holanda, Italia, Bretaña, Inglaterra… y quiciás tamién de México.
Una impresionante progresión,especialmente importante si camentamos na situación d’aisllamientu per tierra, mar y aire al que ta sometíu Xixón en concreto y Asturies en xeneral.
Difícilmente pue desplicase la estrañeza que se xenera cuandu hai que desplicar les formes de llegar a Asturies dende orixes internacionales, y son munchísimes les vegaes nel que l’aeropuertu Santander acaba siendo’l segundu sinon el primer aeropuertu asturianu.
En tou casu, el SISGA avanza, el restorán El Duque acoyerá la Cena Gala, y de nueu podremos maridar les meyores sidres colo meyor de la gastronomía. Amás esti añu, la xornada de Tastia Abierta tendrá llugar nel Centru Cultura Antiguu Istitutu de Xixón. Tou un lluxu que rescamplará ainda más la calidá del eventu, facilitando la participación de les presones interesaes.
